حلاوه طلوع الروح

 

حلاوه طلوع الروح

 

والأن عزيزى المواطن الغلبان .......الشهير بسياده المواطن ......عشان تعرف بس انك بتقرا لكاتب بركه .....مكشوف عنه اللحاف ......وبيفهم فى الطالع .....ويفتى النازل ......وبيحلل الظروف السياسيه فى البلد ......فشر معمل البرج .....

ولما احط السبكى ومحلب فى مقال واحد ......._راجع مقال الأسبوع الماضى ......خش ع الفحم_......الا ياسيدى ويطلع رئيس الحكومه بجلاله قدره  .......ويسيب الأنجليز والفرنساويين والأسرائيلين والأخوان والأرهابيين .....وبدل ما يمضى على اطباق .....زى ماقال الزعيم خالد الذكر عادل أمام ....الا ويمنع الفيلم بتاع الراجل الغلبان ......والوليه المكسوره الجناح ......الست هيفا ......

وبغض النظر ان كان لنا موقف داعم للسبكى او ضده  او مضمون او قصه او ماجاء بهذا الفيلم بالذات ....او نوع الفن الذى تقدمه السيده هيفاء ....

ومره  اخرى بغض النظر عن اولويات الحكومه والسيد محلب .....ومدى وحجم المشكلات التى تمر بها البلاد .....واللحظه الفارقه الى بقالنا 4 سنين  مش عرفين نلحقها ولا ندركها ........

فأن مشكلات بحجم  الأنتخابات الرئاسيه القادمه .....والأمن....  والدعم ..........وانقاذ الأقتصاد المتردى .......والسياحه ......والمطالب الفئويه .....وكاس العالم فى البرازيل .....تتوارى خجلا امام هذه المشكله .......

ولكنى احذر السيد محلب ......ان هذا القرار قد يكون له عواقبه الوخيمه .....التى قد تتجاوز قليوب.. ....وشبرا الخيمه ..........الفيلم كما قال النقاد منقول نقل مسطره من الفيلم الأيطالى ...."مالينا"...لمونيكا بيلوتشى ....

وبدون الأشاره الى ذلك طبعا .....

واحنا مش ناقصيين مشاكل مع ايطاليا ولا اى دوله فى الأتحاد الأوروبى .......ومش ناقصين تلاقى الست .....اشتون ......نطالنا .....بكره وهاتك يا س وج  حوالين الموضوع .....ولكلكه وعكعكه .....ومش بعيد الأخوان يخشوا  الخط .....ويستغلوا الفرصه ويشغلوا خلاياهم النايمه هناك .....ويبقى كده دعم_وخلى بالك من كلمه دعم دى_ غير مباشر للخطه والمؤامره الإخوانيه ...القطريه ....التركيه ...الباكستانيه ....الإسرائيليه الإمريكيه .....الحمساويه ....على مصر ....وكده بدل الحكومه ما توصل الدعم لمستحقيه من  بناء الوطن.....وصلت الدعم ....لكارهيه....من اعداء الوطن...

ومش هانقدر نقول بعد كده واحنا "مالينا"

 

ولمن يطالبون بعدم تدخل السياسه فى الدين .......و السلطه فى الفن ......احب افكركم  ان اخر مونيكا دخلت فى السياسه......بهدلت رئيس امريكا السابق كلينتون ..... ومسحت بيه الأرض وجابت داغه .....وخلته اعتذر للشعب كله ......فما بالكم بقى .....بالأخت بنت الحاج بيلوتشى ....ودى طاليانيه صايعه من حوارى سيسلى "صقليه"........ومش ناقصين لا المافيا الأيطاليه .....تاخد خبر ....و تدخل فى الموضوع .....

ما يعجبنى فى الموضوع ....ان الأزهر لسه بعد شد وجذب .......ما بقلوش يومين ياحسره.......اجازعرض فيلم نوح .....بسفينته.... بسلاطته ....بباغنوجه ......تقوم تيجى رياسه الوزرا وتعمل العمله ....الفحم .....دى ...

ولن نتكلم عن كشرى فصل السلطات  الذى نعيشه .....الا اننى اعتقد ان التوقيعات التى جمعنها لوقف الفحم .....لابد وان نتقدم بها وحسب فهمى الى الجهه المختصه .....الى هى فى الغالب هتكون ....هيئه الرقابه على المصنفات الفنيه .....وليست هيئه الرقابه على الصادرات والواردات .....وقد نحتاج موافقه الأزهر برده .....او المجلس المللى القبطى برده .....مايضرش.....او هيئه الصرف الصحى .....او الثروه السمكيه.....او المجتمعات العمرانيه .....فقد اتضح لدينا بما لا يدع مجال للشك .....ان الحكومه وتسهيلا على المواطنين....تعمل بنظريه الأاوانى المستطرقه ....يعنى ممكن كل جهه تصدر قرار لأى جهه اخرى   تانيه فى اى موضوع .....تابع او مش تابع ....طالما هى جهه حكوميه والسلام ....وكذلك فيما اعتقد يحق للمواطن ان يتقدم... بطلبه او خدمته او شكوته ....مع ان الشكوى لغير الله مذله ......الى اى جهه حكوميه برده .....تسهيلا عليه .......لأنه فى جميع الأحوال ستتقدم ..... هذه الجهه بشكواه ......الى اقرب صندوق زباله .....ودمتم .....

ولن نتكلم عن حريه الرأى والتعبير ...فهى مواضيع عفا  عليها الزمان .....واتهرست فى 100 فيلم قبل كده يا مان .....من اخواتنا  النشتاء ....والحكوكيين ......

الأكيد ان هذا القرار ....خدم السبكى خدمه عمره ......ودخل الست هيفا التاريخ .....ومش بعيد نلاقى الفيلم  مترشح لجايزه الأوسكار .....او ايمى........ او الجولدنجلوب ......حول السينما المقهوره والممنوعه ......فى العالم ولامؤاخذه التالت .....اللى هوا احنا .....

اما انت عزيزى المواطن .....فربنا يصبرك على مابلاك .....وان شاء الله المقال اللى جاىى هاجيبلك كام وصفه من طب الأعشاب..... لخفض ضغط الدم..... وعلاج الجلطات المزمنه ......لأن الأدويه بتاعتنا .....زى مانت عارف ميه ساقعه وما بتعالجش حاجه ......دا لو لقيتها من اساسه فى الصيدليات .....وربنا كرمك ولاقيت حد يشترى عفش بيتكم .....عشان تجيبها .....وياروح ....مابعدك روح.....

ويا عزيزى سياده معالى رئيس الوزارء .........

..و كما قال محمد لطفى ......"دلعها فى الغيارات ......تريحك فى المطبات"........

اشمعنى  بتيجى فى هيفا  .....وتتصدر 

.

خش ........ع الفحم

خش ........ع الفحم 

وشووووووووبش ياقشاش.....مع الأعتذار لرفيق السلاح السبكى ........مش قادر اصدق ان حكومه الزميل العزيز الأخ العقيد ......ابراهيم محلب ......ونحن فى نهايه مطلع القرن الواحد والعشرين........تتخذ مثل هذا القرار.........بالعوده الى استخدام الفحم كحل لأزمه الطاقه المستفحله فى مصر ...............

واللى اوله فحم .....هتبقى اخرته ايه ...ان شاء الله ..؟؟؟؟

يعنى معقول بعد كل .......هذه الحركات السياسيه ........ والإتلافات الثوريه ........والتجمعات الشعبيه .......ان تظهر فى مصر حركه اسمها ..........مصريون_ضد_الفحم.............ثوره دى ولا انقلاب...... 

وبدل ما اقف شايل فارغه خرطوش او قنبله دخان من الى الداخليه كانت بترشنا بيهم .......هاقف وانا ماسك فحمه .....

ويبدو ان الحكومه زعلت على مشروع النهضه الى الرئيس المعزول يوم طلوعه ع المعاش ......مرسى ...معرفش يوريهولنا ......فقررت ان تعيدنا الى عصر النهضه ......والثوره الصناعيه ......وقالت تجيب لنا التاريخ من الأول .......باعتبار ان مجموع مصر فى القرن 18 و19 ما يدخلهاش القرن العشرين .....واكتشفت اننا دخلناه واحنا شايلين مادتين .........فقالت نعيدهم ونحسن مجموعنا .....................

وبديهيا .......ان تكون المادتين هما .....تاريخ .............وتربيه بيئيه .......

ولأنها ترانا عالم بيئه ........فلم تأخد بنصيحه وزيره البيئه ..........او تقتنع ان الفحم ......هيبوظ لنا ......شويه الهباب اللى لسه فاضلين فى هواونا .....بنشمهم .......وعايشين عليهم .......

ونحن ننصح وزيره البيئه ......انها تسعى على رزقها .......وتجرى على معاشها من دلوقتى...........او تجهز لنفسها عربيه .....امام رئاسه مجلس الوزراء فى إشاره القصر العينى .......جنب الحيط الى حاطه الجيش .......تشوى عليها دره ع الفحم .....

المتعمق فى الموصوع سيجد ان الحكومه ....بعد ما باعت شركات الأسمنت المحليه .....لمستثمر رئيسى ....وهو طبعا اجنبى .....وتحولات احتكارات الأسمنت فى مصر الى ما يشبه الكارتيل .....وتمد الحكومه هذه المصانع بالطاقه المدعومه .....ثم تسمح لهذه الشركات ان تبيع منتجها بالأسعار العالميه ......فى السوق المحليه ........المهريه .......وتقطع الكهربا علينا نحن المواطنين.......بحجه وصول الدعم الى مستحقيه ......وهذه هى الجريمه الكامله...

وحين طلبت الحكومه من هذه المصانع ان توفر احتياجاتها من الطاقه .....قررت المصانع استخدام المنتج الأرخص ......وهو الفحم .....وسلم لى ع الهوا يا حبيبى .....

الحومه تبعنا لا تستطيع ان ترفض .....لأنها لا تستطيع ان توفر البديل ......

وطبعا الحكومه الى تقرر فى القرن الواحد والعشرين...... انها تحل ازمه الطاقه باستخدام الفحم ................تستاهل يترصلها حجرين............وسمعنى سلام ....ياوابور يامولع .......

واخيرا لا يسعنى فى هذا المقام سوى تذكر نصيحه الأخ الرفيق سيد برشامه ......وهو مناضل وطنى كان يدافع عن قضيه مصر زى مصطفى كامل بالظبط .......الا انه استبدل المحافل الدوليه بالغرز والمخانات ......واستبدل العواصم الأوروبيه ......بالمناطق ذات الزخم السكانى..... فى صفط اللبن وما حولها ..........وتتلخصى نصيحه برشامه فى انه عند حدوث اى كبسه .....لابد من ازاله اثار العدوان ......والدخان ....والولعه .........بطريقه طبيعيه جدااااااااااااااااااااااااااااا......

ولذلك عزيزى سياده رئيس الوزرا ....... كلمه واحده هارد بيها على انتوا ناويين تعملوه فينا ......

خش خش خش خش خش خش خش خش ......ع الفحم .......

مخطئ من ظن يوما .......ان للثعلب دينا

النصيحه تأتى من من امير الشعراء احمد شوقى بيه.......

ولكن فى مدرسه المشاغبين كان لحسن مصطفى "ناظر المدرسه" .....رأيا اخر .....وهو انه لما تكون حتى المتنبى .....وممعاكش بطاقه ...امامك احد اختيارين .....اما ان تذهب معه لقسم الشرطه ......او تدفعله .....وبالرغم انه لم يحدد نوع البطاقه ....اذا كانت بطاقه هويه ........او بطاقه انتخاب .......الا انه لخص الأوضاع والحال .....فى المحروسه...

وفى روايه اخرى .....كان اللمبى اكثر صراحه حين اعلن .....ان الجنيه غلب الكارنيه ....

والأن عزيزى المواطن الغلبان .....الشهير بسياده المواطن ........اذا كنت مواطن صالح ....ورايح تدلى بصوتك فى الأنتخابات ....تسمح تقولى ....ناوى تنتخب على اى اساس .....يعنى ماهى معاييرك الأنتخابيه ....دا اذا قررت انك مش ناوى تبيع صوتك يعنى.....

هل عرفت من هم المترشحون فى هذه الأنتخابات ....ماهى خلفياتهم السياسيه والأجتماعيه .....والأفتصاديه ......توجهاتهم .....اراءهم فى القضايا العامه والمصيريه التى سوف تحدد مصير هذا الوطن ......

ماهى مصادر تمويل حملاتهم الأنتخابيه ......وعلى اى اساس ....يختارون مساعديهم ومندوبيهم ......ومعاونيهم ......

ما موقفهم داخليا ......من عجز الموازنه ....والبطاله....... والسياحه.... والأسكان .....والتعليم ....وحرس الجامعه .....والأمن.... والضرائب..... والطاقه والكهرباء......ومشروع قناه السويس ........وتامين المبارايات......واذاعه ماتشات كاس العالم اللى قناه الجزيره واخده بثها حصريا على القناه الفرعيه الجديده بتاعتهم .....

بلاش تسأل عن موقفهم الخارجى .....من اسرائيل وحماس والسلطه الفلسطينيه.....وليبيا والسودان واثيوبيا.....وسد النهضه ......وحقول غاز المتوسط ........وامريكا والأتحاد الأوروبى وتركيا وقطر ......وروسيا...... وضم شبه جزيره القرم ......احسنلك .....واحسنلهم.....

اذا كان عندهم ولامؤاخذه يعنى .....اى خطه للتنميه .....او والعياذ بالله جذب الأستثمار ......او اصلاح
الأقتصاد...هل هو مع الأقتصاد الحر ....ام الموجه ....ام المقنن....او يطلق يد الدوله .....او حل اى مشكله مستعصيه من 90 مليون مشكله الى موجوده فى بر مصر ......

اذا عرفت تجاوب على الأسئله دى ......اتكل على الله وانتخب اى مرشح يعجبك ......لأنك هتبقى المواطن الوحيد فى مصر اللى عمل كده ....

واذا ماعرفتش .....مش مهم ....برده اتكل على الله وانتخب اى مرشح يعجبك ......لأن مهما كانت الأجابه الى انت حصلت عليها......هتتغير اكيد .....بعد المرشح ما يبقى رئيس ........وبكره افكرك.....وارجع تانى قرا حكمه شوقى .....عنوان......المقال....

ولكن افه حارتنا ......النسيان

 

 

 الله يرحمك امحفوظ .....ويبشبش الطوبه الى نوبل حطها تحت راسك ......

الدرس الوحيد المستفاد من التاريخ .....انه لا احد يستفيد من التاريخ .........

والأن ...يايها الأخوان ....._ولا بلاش الإخوان دى_...... المجتمعون في هذا الصوان ......من سالف العصر والأوان .....انتم مدعون لمشاهده فيلم قديم حمضان ............شوفتوه كتير زمان.....

ولم اكن انتوى .......ولكن الشيطان فهلوى ......واذا كانت الأعمال بالنيات .......فالأنتخابات ...بالأصوات والترشيحات .....والإنسحابات.....ودى اضافه حديثه للعلوم السياسيه .....

قال الأخوان .....ليس لنا مرشح للرئاسه .....واترشحنا عشان خاطر عمر سليمان .....

وعشانك ياحنان ......اترشحت للبرلمان ......

في القران .....ربنا ارسل لكل قوم ......اخيهم .....

والى عاد اخاهم ......هود......

والى ثمود اخاهم ..... صالح......

خاطب الله كليمه موسى .....فقال اذهب الى فرعون ......انه طغى .....

ارسل الله موسى لفرعون .....ولم يرسله للمصريين .....

المصريون ....على دين ملوكهم .....

موسى لم يكن اخا لفرعون .....لكنه متربى في حجره وفى بيته ......

واذا اعتبرنا ان جيش فرعون كله غرق في البحر ......واللى رجع هما العجائز والعبيد .....هنعرف ليه الحضاره الفرعونيه اتقطعت .....وانتهت عند الناس دى ....وهنكتشف الحلقه المفقوده الى جوانا ....الى بين الفراعنه الى بنوا الأهرامات ......

....والفراعنه الى ساكنين دلوقتى في ...الطالبيه ......والمنصوريه .......واول فيصل.......

الأسطوره تقول ......ان عمرو بن العاصى وصف مصر للخليفه عمر بن الخطاب فقال .....

"ارضها ذهب .....ونيلها عجب .....وهى لمن غلب ....."

في تأكيد غريب لأسطوره حرافيش محفوظ ......

عاشور الناجى .......اسم الله عليه اسم الله عليه...

سليمان الناجى ......اسم الله عليه اسم الله عليه ...

وكل ناجى .....اسم الله عليه اسم الله عليه ....

العسكر .....كانت عاصمه الأخشيد في مصر ......والى مايعرفوش ....دا كافور الأخشيد بتاع زيت الكافور .....حكم مصر وبنى دوله اسمها كده ...كتب فيه المتنبى اشعارا عديده ......وكان عبدا اصلا عند العباسيين .....

الدوله الوحيده الى حكمها العبيد .....المماليك .....واسست ليهم دوله .....العز بن عبدالسلام ....له فتوى شهيره .....بعدم جواز .....حكم المماليك .....العبيد .....ويقال انه خسر بسببها حياته ...

اما العز بتاع الحديد .....فقد افتى بجواز ترح جمال ....باعتباره مواطن مصرى .....زيه زى اى مواطن ....يكفل له الدستور حق الترشح ...وخسر بسببها حريته ....الى حين....

وتذكر  عزيزى المواطن .....ان عرابى حين قام بهوجته ووقف امام الخديو... رفض مقوله الخديو ...مانتم الا عبيد ......احساننا .....

ولكن قريحته.....حلوه قريحته دى .....لم تسعفه الا ان قال ....لقد خلقنا الله احرارا .....ولم يخلقنا تراثا ....او عقارا....

رفض عرابى الخصخه في مقولته ...ورفض ايضا الأستثمار العقارى ....على اراضى ملك الدوله .....الشعب بوضع اليد.....

وغنى عن التعريف .....ان ثوره عرابى ..انتهت بنفيه .......ودخول الإنجليز مصر ....

لذلك لا تحزن عزيزى الثائر ......فكلنا لها ....

واللى تديله جوله .....واللى تديله دوله......واللى تديه مقاوله اكبر من الهرم .....

وادعوله في الحرم ......او فى الصندوق

 

كلاشينكوف

كلاشينكوف الله يرحمه وهو ماسك الكلاشينكوف .........ياترى هيتحاسب ازاى الجدع ده ....

ابانا الذى....... فى الشئون المعنويه

 ابانا الذى....... فى الشئون المعنويه  

طيب ...انا راضى ذمتك ....يرضيك اللى بيحصل دا.......

مش كده ياراجل ؟؟؟....دا احنا فى القرن الواحد وعشرين  برده ......احترم سننا ادام العالم ....دا...احنا اقدم دوله فى التاريخ .....مش معقول ان الدول كلها بتلغى وزاره الأعلام ....واحنا بنرجع وزاره الإرشاد......

يعنى قفلتوا القنوات الدينيه وقلنا ماشى ...اهى كلها تحريض وعمرنا ما استفدنا منها حاجه .......انما توصل  ان القنوات الفضائيه الخاصه تنافس  التليفزيون المصرى ....طيب الله ثراه .....لأ كده كتير قوى ....مينفعش افتح كل القنوات الفضائيه الاقيها بتتكلم فى نفس الموضوع ....ومستضيفه نفس الخبرا .....عشان يقولوا نفس الكلام .....حتى المداخلات على كل القنوات .....بقت مكرره....جايه من نفس الناس ونفس الأماكن ....

ويتواصل المد الثورى ......الحمدلله .....جه اليوم اللى نشوف فيه الهام شاهين رافعه .....لواء الثوره ....وتعلن على الملأ فى مؤتمر اتحاد الكتاب والمثقفين .....انها كانت الشراره ....التى جعلت الشباب المصريين .....يثورون ضد مرسى ....الله يرحمه .......صادقه ياطاهره.......وتعلن انها هتعلم الشباب الإسلام الصحيح ........الله يرحمك يابن لادن  .......أحبيبى ....وهكذا ايها الساده ظهر للثوره المصريه ....جان دارك....المصريه ....التى ستقود جموع الشباب نحو الحريه ......الله 

عليكى يا مصر

الحقيقه ان الواقع .....فشخ الكارتون .....الصراحه ....يعنى ...وافتح اى قناه تليفزيون مصرى هتلاقيها مشغله مارش عسكرى ..........ثم اغنيه مصريتنا .....وطنيتنا.... حماده امام.....ثم اغنيه العظيمه ...انغام .....مش من بلدنااااااااااااا.....ولا نعرفه .....ثم يتحفنا على الحجار ....باكتشافه ان مصر فيها شعبين ......واخيرا....هنختم بالسلام الوطنى لجمهوريه التوك توك والميكروباظ........تسلم الأيادى ........واعتقد ان الكوكتيل ده ....مقترح من حزب النور .....باعتبار ان الموسيقى حرام ......ورجز من عمل الشيطان ......وبيكرهوا الشعب فيها ......

وكله كوم ومصطفى كامل الى انت سايبه علينا دا ....كوم تانى...

مش كفايه "تسلم الأيادى"....اللى بقت السلام الجمهورى الرسمى لدوله التك تك والميكروباظ.....لأ سايبه كمان يعمل اغانى للدول المجاوره .....لأ وواخدها مقاوله .....جيش وشعب وملك وكتابه ......

الحقيقه ان اعلام دريه شرف الدين ......لا شرف ....ولا دين ...الصراحه

وكله كوم .....واللى اسمه..... مورتا سيديهات  دا كوم...وانت طالقه علينا ....الراجل ضرب الرقم القياسى فى الشتيمه ....رجل كل العصور ...فى ليله واحده فى برنامج واحد......شتم ضياء رشوان... وخالدصلاح....وممدوح اسماعيل ...ومحمود سعد .....وريم ماجد....وسامبو.... واحمد دومه..... وقالك الخاينه اسماء محفوظ.... واسراء عبد الفتاح .....واحمد ماهر ...وعفيفى .....مين عفيفى دااااااااا......ويدين حاله الهيجان فى اليوم السابع ....واعلام المؤخرات فى اون تى فى ....وقالك اللى زعلان ع البرادعى .....يروحلوا .....والطابور الخامس ...و7 دول مخابراتهم بتلعب فى البلد .... وقال عنده صور فى اوضاع مخله ل6ابريل .....وائل عباسى ...والأشتراكيين الثوريين اللى ما بيستحموش ....وممدوح اسماعيل بتاع العباره ....ويوجه لعلاء الكحكى انذار اخير ع الهوا .....وقالك ماعرفش معالى زايد ولا عمرى شفتها ...ويتوعد كل من يعارضه ..بمصير شوبير وباسم يوسف.....ثم يفجر المفاجأه ....انه بيعمل مسلسل عن قطر والشيخه موزه .......ويتوعد كل من يظن نفسه محفوظ عجب  الصحافه ......وهيقفل حزب العجله والدبله .....ثم يشكر الإعلاميين المحترمين ....امثال توفيق عكاشه ....

الراجل  ...دا بيفكرنى بسعيد صالح فى مسرحيته الشهيره ....لما بيقول ابن مين فى مصر .....خالك مين؟......

ومحسسنى ان الثوره كده خدت منعطفا تاريخيا ....وبتمر بمنحنيات خطيره ......ع الضيق .....احنا مش ادها اكيد .. 

الراجل  تقريبا ماسبش حد فى مصر ما شتموش ......ولا هدده بالسجن غير ..........ابو الهول

ولذلك ستجد ان من اروع ما قدمته الدراما المصريه .....من ملفات المخابرات العامه المصريه ....

مسلسل...... جمعه الشوان ومسلسل رأفت الهجان ...........لصالح مرسى

ومسلسل ......مورتا سيديهات على قناه الفراعين ................لصالح الفلول

والنكته الكبيره بقى...... ان جماعه انصار بيت المقدس..... تعلن مسئوليتها عن محاوله اغتيال وزير الداخليه...محمد ابراهيم ......مش ....مشكله ان الجماعه دى ....هى ذات نفس الجماعه ....اللى حبيب العادلى ...الله يرحمه .....اتهمها بتفجير كنيسه القديسين بالأسكندريه ........فى عهد المخلوع مبارك ..... فى اخر راس سنه.... فى اخر خطاب ليه .....يوم اخر عيد شرطه ....الله يرحمه .....يوم 25 يناير .......فى قلب اكاديميه الشرطه .......التى تشهد ولا فخر ......محاكمه حسنى مبارك .....المشكله الحقيقه .....ان الجماعه دى ....ماعملتش فى تاريخها اى عمليه.....خارج الأراضى المحتله ......

ثم ......يعنى مثلا ....تفتكر انها تكون صدفه ان اتنين من مرشحى الرئاسه السابقين .....يرشحوا السيسى ....لرئاسه الجمهوريه فى نفس اليوم .....توارد خواطر ...مثلا

ثم تظهر حمله "كمل جميلك " ....لجمه التوقيعات لترشيحه للرئاسه ....

عشان كده .....

...ولذلك فأنى ادعوكم ....لجمع التوقيعات ......لحمله"ماتبسطهاش..... اكتر من كده "

"......ثم جمع التبرعات ....للشعب المصرى فى حمله ......"عشانا عليك...... يا رب"

ازهى عصور السياسه...

ازهى عصور السياسه

تعيش مصر الأن ازهى العصورالديمقراطيه السياسيه  ....بل وتخلق علوما سياسيه جديده لم ينزل الله بها من سلطان من قبل ....اذ تدخل حياتنا السياسيه فجأه امور غريبه فجأه.... ويخرج منها ايضا 

امور غريبه فجأه ...... وتعبت من المفجأه ونزلت دمعتى....

ف...سبحان العاطى الوهاب ......بعد الشبشب والقباب ...يعطى بدون حساب ...فبعد عصور طويله من حكم الرئيس الأوحد.... الزعيم الملهم... صاحب اعمده الحكمه السبعه .......لدينا فى مصر الأن... رئيس مخلوع ورئيس معزول ورئيس مؤقت ...رئيس سابق ورئيس اسبق ....رئيس منتخب ورئيس معين ....رئيس فى السجن ورئيس تحت الإقامه الجبريه ...بالمناسبه ....مبارك تحت الإقامه الجبريه وللمفارقه بموجب قانون الطوارئ.... يعنى لو مفيش قانون طوارئ مكانش حد قدر ييجى جنبه ....بس شوف حكمه ربنا...وعشان ربنا مابيرضاش بالظلم .... قانون الطوارئ اللى فضل حطه على رقابينا 30 سنه هو اللى حدد اقامته ....وبالمناسبه... برده كده مبارك داخل التاريخ داخل يعنى باعتباره تانى رئيس جمهوريه  تفرض عليه الإقامه الجبريه بعد محمد نجيب... الله يرحمه ....ماعلينا ...وعندنا برده .....مرشحين سابقين للرياسه ....ومرشحين محتملين للرياسه...ورؤساء احزاب ....وزعماء جبهات.... ونائب للرئيس المعين ...استقال... فى اول سابقه تاريخيه من نوعها ان يستقيل اى مسئول فى مصر لأى سبب كان ...الجديد بقى ان تانى يوم يحال للمحاكمه بتهمه خيانه الأمانه .......ويظهر ان الحكومه كانت ماسكه عليه كمبيالات او شئ من هذا القبيل ....او الهابيل 
...

وبعد ما كناش لاقيين اد عشرين تلاتين واحد نعمل بيهم مظاهره ضد حصار اسرائيل لغزه ....يتظاهر مؤيدو مبارك بكل حريه امام مستشفى القوات المسلحه بالمعادى ....المقر المختار الجديد لمبارك .......احتفالا باخلاء سبيله...بينما تلغى 6 ابريل مظاهراتها منعا للفتنه واختلاط مظاهريها مع الأخوان ...وتحولها الى مناطق مستهدفه ......  من البلطجيه طبعا ......رابع اقوى جيش فى العالم "جيش البلطجيه"....ويطلق عليهم احيانا الطرف التالت ....فى اشاره واضحه لتدخلهم بين اى طرفين فى المعادله السياسيه فى مصر ...

وبعد ان كانت اقصى امانينا....ان   يفعل قانون محاكمه الوزراء الذى صدر فى الستينات ولم يستعمل قط ...وقيل لنا انه المدخل الوحيد لمحاكمه اى مسئول فى  مصر ان شالله  حتى يكون  مسؤول فى وحده محليه فى بنها ....او رياح فى المنوفيه ....يتحاكم....تظهر بلاغات بالعماله والتخابر وتلقى اموال من الخارج.... بدايه من البرادعى ومرسى.... ومرورا باسماء محفوط واسراء عبدالفتاح وعلاء عبدالفتاح ونهايه بحمود بدر بتاع تمرد ....اى والله .....بالإضافه الى قيادات الإخوان بالطبع ...وتحقيقات مع جميع مرشحى الرئاسه عن اموال حملاتهم الإنتخابيه ...لدرجه انى خايف اكلم سليمان البواب ليكون عميل  ل ...س اى ايه  والمسئول عن الخلايا النايمه فى بولاق او الكلاب الميته فى الوراق....

و يعلن حمزاوى الليبرالى ....استاذ العلوم السياسيه.... اعتزال الحياه السياسيه ....وبينما يجهز  الأعلامى الجهبذ  ....توفيق عكاشه... نفسه ليكون ممثلا للشعب فى اول برلمان منتخب بعد ثوره 30 يونيو...لا نجد اعلاميين جدعان ... طالما كانوا يعبرون عن صوت الحريه مثل يسرى فوده وريم ماجد ولا حتى بلال فضل ...بلاش ....دا حتى علاء الأسوانى معدناش شايفينه ...ومتهيألى مفيش ولابرنامج ممكن يشرب بيريل ويستضيفه دلوقتى ...بينما يرتع مرتضى منصور على جميع القنوات ويشتم فى كل الإتجاهات.....

اما الشعب اللى عمره ما تكلم فى السياسه استبدل الكوره بالسياسه وبدل ما كان عندنا 90 مليون حسن شحاته بقى عندنا 90 مليون 
مرشح محتمل لرئاسه الجمهوريه .....بيتكلموا فى السياسه ...

تحس كده اننا مخطوفين ذهنيا... على راى الجهبذ بتاع الشرطه

ويقولك العسكر حموا الثوره ....والإخوان هما الى عملوا الثوره.... وكأن الثوره دى كانت ايام الف ليله وليله وبيحكوا لنا عنها ...وكأننا ما عشنهاش ...محدش حمى الثوره الا الى عمره ما قال انا عملت ثوره... والى ماتوا فى جناين مصر ...وبتوع المولوتوف الى مرسى قال عليهم بلطجيه ...... وفتح علينا بدالهم الطفح الى ولع باكبوراتات مصر...

ويصف المؤرخون 30 يونيو على انه كماله لثوره 25 يناير ....وكأنها كانت ثوره الكشرى ...ودقه  الربيع العربى ....ماشى ....وطبعا .....سلاطاته وبابا غنوجه التى لا يستغنى عنها الشعب ....كحظر التجول والطوارئ والذى منه .... ........

ويتحفنا التليفزيون المصرى كعادته ....بنشرات اخبار  تتفوق على الدراما التركيه ......تحس كده انها ولا مشويات ام حسن ....مش مصدق ان دا تليفزيون... دريه شرف الدين وزيره اعلامه .... الحقيقه اعلام دريه ......لاشرف ......ولادين .................وكأن لاثوره قامت ولا حسنين...

وعندى احساس حقيقى ان مصر بقت ولا الامم المتحده ...لأن البعض يتحدث عن عدوان رباعى 

....ومؤامره شيطانيه امريكيه اسرائيليه اوروبيه قطريه...

او كما قال الاستاذ  العظيم فهمى هويدى اصبح لدينا نموذج للثوره تركى رومانى "منسوب الى رومانيا وليس روما" جزائرى باكستانى ...اى والله قال كده

لقد هرمنا ........هرمنا ..........هرمنا ياولاد ........