..شفت فيلم الفتوه .....

..شفت فيلم الفتوه .....

شفت فيلم الفتوه..... شفت رد فعل فريد شوقى فى فيلم الفتوه..... اول مشهد لما دخل السوق فاغرا فاه..... حلوه فاغرا فاه دى ... وواحد بلدياتنا...... رزعه على قفاه..... ولما لف وساله ايه ده قالوا..... لامؤخذه يا بلدينا ....راح سابه وسكت واثر السلامه ....ولقطته تحيه كاريوكا ....وفى نهايه الفيلم .....لما اتكرر المشهد مع محمود المليجى .....وكل القفا اياه ولما لف وسال ايه ده قالولوا .... لامؤخذه... ولقطته هدى سلطان.....

هوا دا بالظبط حال الشعب المصرى لما الحكومه زودت الأسعار.... والشعب حس بالقفا اياه .....ولما اتدور وسأل ايه ده..... رد الوزرا من عينه يوسف بطرس غالى .....ورشيد محمد رشيد...... لامؤاخذه هى دى اليات السوق .....ولزوم الليبراليه.... و متطلبات السوق الحره..... و ظروف الخصخصه..... و أساسيات الحوكمه ....و بدائيات الشفافيه .....ووبديهيات الرأسماليه...... و غيره....

 ولما صاحبنا اللى هو من الشعب المصرى..... ذو حضاره السبع تلاف عام ساكت..... والذى يتمتع بنسبه اميه بسيطه 40%...... اميه دا غير 20% من الباقيين اميين برخصه وشهاده من الوزاره .......مفهمش حاجه من اللى اتقال....... وعندما أدرك صاحبنا الشعب المصرى الشقيق انه حتى مش هيقدر يولع فى نفسه ......لأن الجاز غلى حيث ان الحكومه زودت كمان اسعار المحروقات اللى هى السولار والبنزين والجازوكمان الغاز......

قعد يبرطم... ويهلضم ... واثر الصمت البهيم ......

اما اللى مفروض كان يحصل هو الأتى :

يرقص نواب الشعب فرحا..... فى مجلس الشعب .....تأثرا بعزومه احمد بيه عز فى الهيلتون اياهااااا..... ويخرج الشعب المصرى كله .....عن بكره ابيه الى الشارع...... وتصيح الجماهير الهادره فى الشوارع.......بعد ان تكشف راسها وتدعى دعوه وليه ساعه مغربيه ......

"قومى يا ذكيه اعملى طعميه للحكومه الإلكترونيه ".......

(موبايل فى اليد......... ولا الحوجه لحد)

بالتأكيد ان الموبايل يا اعزائى  جهاز معمول خصيصا للمصريين واقطع دراعى ان شركات الأبحاث والإختبارات ودراسات الجدوى الأجنبيه لو شمت خبر عن المصريين وعمايلهم فى الموبايل لكانت عملتهولنا من 100 سنه و اكيد  اكيد  كانت بتستخدم عينات دراسه من المصريين وده اللى  ساهم وعجل باختراعه واكيد انهم توقعوا سلوك المصريين الموبايلى الجديد.....

 ونظره واحده للمجتمع المصرى فى الشارع مثلا سيدرك البنى ادم انه لاحياه بدون موبايل والموبايل هو الحياه  فى مصر وهتحس ان نسبه انتشار الموبايل فى مصر من اعلى -ان ماكانتش اعلى - نسبه فى العالم يمكن تحس انه موجود فى مصر اكتر من امريكا واوربا مثلا للأنك مش هتلاقى الخلق هناك واقفه ملطعه ع النواصى تتكلم فى الموبايل فى الفاضيه وفى المليانه ومش هتلاقى واحد بيكسر الأشاره وهو سايق عربيته وبيتكلم فى جهازين موبيل وسماعه  مع بعض  او هتلاقى واحد قاعد ع الناصيه تحت يافطه مكتوب عليها    "دقيقه الموبايل 50 قرش ".

والحقيقه ان الموبايل جهاز مناسب لطبيعه المصريين وشخصيتهم تماما فلو اخذنا فى الإعتبار ان العرب بصفه عامه والمصريين على رأسهم  ظاهره صوتيه وحنجوريه وفنجريه "بؤ" وبتوع كلام واجدع ناس فى الفخر والحماسه والهجاءوالشتيمه الشفوى من ورا الحيط فالموبايل هو الجهاز المناسب تماما لذلك –يعنى جالهم كده زبديه على فطيره – بالإضافه الى ان المصريين غاوين رغى و لت وعجن ولكلكله وهى بيئه خصبه لإنتشار الموبايل من اول جلسات النميمه للهوانم الكلاس فى النوادى وع البيسين فى مارينا الى قعدات رجال اللأعمال و الذى منه فى الفنادق و الكافيهات الشيك الى حلقات الشيشه فى القهاوى وع الغرز وحتى النسوان البيئه اللى قاعدين ع المصاطب حقق لهم الموبايل هذه الغريزه المصريه الخالصه  وا صبح شعار الجميع والذى فطنت اليه شركات المحمول اخيرا هو اغنيه داليدا الشهيره " وادينا بندردش ...ورانا ايه ...ورانا ايه " .

 والحق يقال فعلا ففى ظل وجود نسبه البطاله الموجوده فى مصر حاليا الى جانب البطاله المقنعه والشحاته فاحنا فعلا شعب ما وراهوش اى حاجه يعملها غير الكلام فى الموبيل او بدونه .

وللموبايل فى مصر استخدامات اخرى عديده ما خطرتش على بال الخواجه اللى عمله ابدا فالموبايل من لزوم اظهار الوجاهه والشياكه والمنظره والفشخره خصوصا لما يكون N-70  ولا I-mate فهو يدل على صاحبه وانتماءاته الطبقيه فبالأضافه الى قاعده    -انت مش عارف بتكلم مين؟ -     الشهيره ظهرت قاعده   - رنه واحده من الموبايل دا واوديك ور الشمس-   (طبعا لازم يكون الموبايل ماركه جامده مع جراب جلد طبيعى وسماعه دهب مثلا).

بالأضافه الى اننا اول شعب يخترع لغه الرنات تفاديا للأتصال وفواتيره

رنه واحده يبقى استنونى انا جاى ...

رنتين يبقى  بحاسب الميكروباص ...

3 رنات يبقى الميعاد الساعه 9 فى قهوه كتكوت وهكذا .......

ولو بعتلك الرساله المجانيه" كلمنى شكرا" تعرف انى مزنوق فى لجنه او كمين ....

 ثم انه علاج جيد للإكتئاب و الكبت  .. اراهنك ان المصريين اول ناس تحط النكت والإشاعات والحكايات والروايات الى ما ينفعش تتقال الا فى ودنك ع الموبايل وهاتك يا SMS وفضايح وسي دى ... و سى دينا... وغيرها ... وانتم سيد العارفين بقى .....

كما ظهرت النكت الى بتتكلم عن حكومه خارج نطاق الخدمه....وفواتير الكهرباء والزباله والغاز اللى ناقص تتحاسب بالثانيه...وظهوروتفعيل خدمات الجيل التانى فى مؤسسه الرئاسه ...وغيرها

كما وجد المصريين فى اعلانات الموبايل تعويضا عن الحرمان والكبت السياسى فظهرت المظاهرات على الشاشات وفى الإعلانات  من اجل الحصول على عرض الكارت والخط فى خطوه واحده وعمت الأفراح فى وجه قبلى و الأقاليم عند تخفيض سعرمكالمات الأقاليم فى اول اعتراف رسمى باهميه الأقاليم  ناهيك عن المسيره العظيمه الحاشده والتى كان شعارها "   يا خدوا مننا اى حاجه ..... ويدونا الصلاحيه " فى اسقاط سياسى واضح والحدق يفهم

 وبذلك يكون الموبايل واعلاناته وسيله جديده لقياس نبض الشارع.

 

اما الشباب فقد وجدوا فى الموبايل ضالتهم ... فهو اسرع وسيله للتعارف والمعاكسه  (لو سمحتى فى عندك شبكه .... موبايلك خط ولا كرت ....انتى موبينل ولا فودافون ولا...  معاك رنه يا قمر ....طب ممكن ترنى عليا ...      خلصت )

  وخد عندك  بقى لما تخلى رنه موبايلك  اغنيه شاكيرا الجديده  ولا توزيع جديد لريكى مارتن اكيد البنات فى الجامعه هيقولوا عليك واد كووول ومش معقول و(مثكف) من الثقافه يعنى  وكله هيبقى عايز ينزلها من عندك وها تبقى اشهر واد فى روكسى ومن هنا ظهرت دوله الرنات و الميسدات واللوجهات والشعارات والإعلانات وهو كله ارخص من اى هديه فى الفلانتاين بتاع الحبيبه الى نازل موضه اليومين دول  وكله يعرف يدلع الحته بتاعته من غير ما اهلها يا خدوا بالهم .... ولسه لما الموبايل يبقى مرئى وعينى عينك.... ودى  بقى  لوحدها ممكن اعملكوا فيها كتاب عن اذنكوا لأن الموبايل بتاعى بقاله خمس دقايق ما بيرنش.......... اكيد اتسرق.