محدش فاهم حاجه
عزيزى المواطن المصرى....صًباح الفل....
احب اهنيك
ان مصر رجعت كامله لينا وزى زمان....زى زمان ازاى ....يعنى ما تحاولش تشغل مخك
عشان تفهم ايه اللى بيحصل فى مصر دلوقتى.......
لأنك مش هتفهم حاجه زى زمان ....وعشان كده
انا باهنيك...........
وبعدين يعنى انت من امتى كنت عرفت تفهم ايه للى بيحصل فى البلد
......لا كنت فاهم ايام مبارك ....ولا فهمت ايام المجلس
العسكرى....ولا ايام
مرسى....وجاى عايز تفهم دلوقتى.....
يعنى هى ثوره ولا انقلاب........شوف هى ثوره
بطعم الإنقلاب ....زى الكرانشى كده .....يعنى
الشعب اراد والجيش نفذ ما اراده الشعب....اى نعم انه شال رئيس منتخب بس
لاحظ ان الريس دا نفسه جاب الشلل للشعب ....ورفض انه يكون رئيس لكل المصريين واهتم
بأهله وعشيرته فقط ....من دون الناس....والريس دا نفسه كان جاى ب52%.... وع
الحركرك ومش محتاج افكرك ان نص الى انتخبوه انتخبوه خوفا من نجاح احمد شفيق......وفى
اخر خطاباته للشعب قعد يقوله... الشرعيه.... الشرعيه.... الشرعيه....السؤال بقى
الى محيرنا كلنا الشرعيه دى دستوريه...وجايه من الدستور اللى ماحدش شارك فيه .....ولا
هو احترمه ....ولا ثوريه جايه من
ثوره 25 يناير ....ولا شرعيه تيجر ...اكبر
وسيطر....
طب الشرطه رجعت تشتغل كده فجأه فى يوم واحد وربنا صلح
حالها وبقت فى خدمه الشعب و ربنا هدااها .......شئ الهى كده.....طب واللى ماتوا وحق
المتظاهرين ..والشهداء....
شوف يابنى ....
ديل الكلب عمره ما ينعدل......
ودى ناس
معروفه بتهيص فى الهيصه وتزيط فى الزيطه بس العيب على مرسى الى سابهم سنه ما
بيشتغلوش وماجاش جنبهم ....لا وزودلهم كمان مرتباتهم من غير شغل وسلحهم بأفشخ القنابل وأغبى المدرعات ....دا
جايبلهم لبس نينجا بالشئ الفلانىياعم
..وماعملش هيكله للجهاز من اول يوم اتقاء لشره
....يعنى هو سابهم لحمايه الكرسى بتاعه وعشان يتقى شرهم....اديهم اتقلبوا
عليه.......وده شئ متوقع ...اما الشهداء فأجرهم عند الله ودمهم فى رقبه اللى
قتلهم.....وكلنا عارفينهم كويس.........
طب الفلول هما نظام مبارك المخلوع .....ولا
نظام مرسى المعزول؟؟؟؟؟؟؟
شوف مفيش تعريف دقيق للموضوع دا ....بس هو
فلول مبارك هما فلول برده بعد مرسى وضيف ليهم فلول مرسى وارامله.....بس الموضوع
يلخبط شويه لأن كل الفلول دلوقتى بيدعوا انهم ثوريين يعنى فلول مبارك ثاروا على
مرسى وفلول مرسى ثاروا على مبارك ......يعنى .... لما تشوف مرتضى منصور بيتكلم
وكأنه مفجر ثوره 25 يناير وبيحلف يمين بالطلاق على وائل غنيم واسماء محفوظ ما
يعتبوا ميدان التحرير .....هتحس كده انه كان واحد من الظباط الأحرار ومكانش متهم
فى موقعه الجمل ولا حاجه .....بالمناسبه مين بقى اللى عمل موقعه
الجمل؟؟؟؟؟؟....
مبارك ولا الأخوان ...........ولا
الفلول.....طيب مين فتح السجون وقتل البطران......مبارك ولا مرسى ......فلول مبارك
والشرطه ولا الأخوان وحماس ........ ....طيب مين هرب مرسى من السجن ؟؟ ........اقولك .......العيب ع
المجلس العسكرى الى ماقلناش الحقيقه او طلع اى بيان من العشروميت لجنه تقصى حقائق
الى شكلهم.....يعنى انت بتعيب فى المجلس.......لا المجلس أجدع ناس ...ومرسى لما
شال طنطاوى وعنان ادالهم قلاده النيل برده .....بس قابلى لو عرفت .....قصدى لو
فهمت .......وربنا يريحنا من دول ودول.....
طب الدستور أتوقف.... ولا هايتعدل.... يعنى
الدستور دا كان حلو ولا وحش ....طيب هيتغير...ولا
هيعدلوه؟؟؟....
اولا.....
دا اجدع دستور فى العالم.... بشهاده الإخوان .......
وبعدين ....دى حاجه ما تفرقش معاك خالص يعنى
هو الدستور قديم او جديد...... حلو او وحش ....شاورلى على اى حد فى البلد عمل دستور
واحترمه ......
طيب فلوس مبارك ......ومرسى.......راحت فين
مين هيجبها.... طيب والمصالحات دلوقتى تبقى مع مين ومين ؟؟؟؟؟؟؟؟......
دى بقى الى تنساها خالص..... تبقى عبيط لو
فاهم انك هتشوف منها حاجه ...مره يقولك لازم احكام جنائيه عشان يطالبوا
بالفلوس......تقوم المحاكمات تقعد سنين وعشان كده سموها محاكمات القرن ....ثم
ياخدوا براءات .......ومره يقولك نعمل مصالحات ويرجعوا جزء منها ....طيب هى كام
اساسا ...والمصالحات دى على اى اساس ....متسألش .... .النكته ان اللجنه الى بتدافع
عن الفلوس طلعت صارفه مش عارف كام مليون لغايه دلوقتى ....يعنى بدل ما تجيب فلوس
...هى اللى خدت فلوس .... .....طيب دول مين اللى معينهم .....مرسى ...طيب دلوقتى مين
الى يسألهم ويحاسبهم .....مفيش.....طيب هل هيبقى فى مصالحات معاهم زى الى نظام مرسى كان عايز يعملها مع بتوع مبارك .....الله اعلم
طيب اروح التحرير ولا رابعه ولا الإتحاديه
ولا ادام الحرس الجمهورى ولا مصطفى محمود ولا النهضه.......روح فى اى داهيه.... مش
هتفرق هتلاقى زحمه وخلاص واعلام مصر وناس بتحزق على المنصات وتتكلم عن الشرعيه بس
كل واحد وشرعيته لامؤاخذه وناس عايزه تولع فى الناس التانيه .......وناس طيبه جدا مالهاش فى اى حاجه وبتحب مصر بجد.......
طيب مرسى منتخب.... وايه يعنى ماهو مالتزمش
بالشرعيه ولا حل اى مشكله من اللى قال عليها هاحلها فى 100 يوم ...._دا هو اللى
قال_.... ولا عمل توافق وطنى ......طب ماهو التدخل جاى من الجيش يبقى
انقلاب.......طب ماهو الجيش برده الى اتدخل فى يناير وخلى مبارك يمشى
.....اشمعنى فى 25 يناير كانت ثوره.....وفى يونيو تبقى انقلاب ؟ ؟؟؟؟...
طيب بتوع حماس دول ايه اللى جابهم وشغالين مع
مين ..... وشحاتين سوريا اللى فى مصر ايه اللى وداهم رابعه ....مش مرسى الى قطعلهم
العلاقات مع سوريا .....طيب اهى الداخليه
بتحذرهم يتواجدوا فى التظاهرات.....
طيب الألتراس دول تبع مين؟؟؟؟؟تبع نفسهم
.....يعنى مع الثوره ولا مع نفسهم ....انهى ثوره تقصد ثوره25 يناير ولا ثوره 30
يونيو.....ماتشغلش بالك.....
واخيرا احب اقولك ان الحق ابلج وان الباطل
لجلج......وعلى راى الأخ المناضل عماد
بعرور......لكلك ...لكلك...لكلكلكلك.....
وكل ثوره وانت طيب يا راجل يا طيب
ونشوفكوا
الثوره الجايه ان شاء الله .....
