دستور حياتى ياعين

دستور حياتى ياعين

(من كتاب دستور يكتبه الشباب)

بعد قيام ثوره 25 يناير العظيمه ....وانتخاب ....ولاحظ كلمه انتخاب دى.... الجمعيه التأسيسيه التى تقوم بوضع الدستور ... طلب رئيس الجمعيه من كل عضو التعريف بنفسه واقتراح الماده الأولى فى الدستور الجديد...

مندوب الأسلاميين

قام ممثل الأغلبيه وهو من التيار الأسلامى فقال الحمد لله و كفى وصلاه وسلاما على المصطفى... اما بعد ايها الأخوه اللأحباب  اقترح ان يكون البند الأول كالتالى جمهوريه مصر العربيه دوله ايمانيه وتطبق الشريعه الإسلاميه ....ولو كره الكافرون ....اقول قولى هذا ....واترك لكم باقى البنود لتتصرفوا فيها كما شئتم ...يرحمكم الله

 ممثل المسيحيين

ثم تحدث مندوب الكنيسه المصريه فقال ....بوركتم ايها اللأخوه... وبارككم الرب فأنتم مرسلى العنايه الإلهيه للشعب العظيم لتضعوا له ميثاق حياته القادمه وليكن دستورنا يا اعزائى المجد لله فى الأعالى و على الأرض السلام وبالناس المسره فماذا يكسب الأنسان اذا كسب العالم وخسر نفسه ...وفقكم الله لما فيه مصلحه هذا الوطن

الجيش

ايها الساده كما تعلمون ان الجيش ...هو حامى حمى الوطن والمحافظ على ثرواته وترابه الوطنى.....واذكركم.....واذكركم ....واذكركم....ولكل من تسول اليه نفسه....

الجيش حمى الثوره....فاهمين....

والجيش والشعب ايد واحده...فاكرين...

اما البنود الخاصه بالجيش هتتكتب فى الدستور بالحبر السرى ....لأسباب امنيه ...وتحيا مصر .

ولذا اقترح ان يكون البند الأول ....الله ...الوطن...الجيش ...

نقيب المهندسين

فلنعمل جاهدين على انشاء دستور محكم ...ذو اساس متين...وبناء شامخ...يعلو ماده فوق ماده ...يربط صواميل جميع طوائف الشعب... ويسخر طاقاته للتقدم ولا ننسى ان نحافظ على البيئه ونعتمد الدستور من هيئات الجوده العالميه لذا اقترح ان يكون البند الأول فى الدستور هو اتحاد وتماسك بناء الجمهوريه المصريه ومواطنيها ....

نقيب الممثلين

ايها الساده نريد دستورا يحافظ على حقوق جميع الكومبارس فى هذا الوطن وليس دستورا للنخبه والمشاهير فقط دستور يعمل" كلوس اب" على الفقراء وينهى هذا "الفلاش باك" الطويل الذى عشناه لمده 30 عاما ايام المخلوع بنهايه سعيده مافيهاش اى دراما  ...قبل تترات الغضب من الفئات المهمشه ....ثم انحنى ليحى اللأعضاء من الجمهور الذى صفق بشده ووقف طابور عشان يتصور مع الفنان المشهور

نقيب الطيارين

....حمدا على سلامه الوصول للجمعيه التأسيسيه ونتمنى لكم دستورا سعيدا ...اوافق على ما قاله الأخوه الزملاء واقترح ان يكون البند الأول فى الدستور كالتالى جمهوريه مصر العربيه دوله حره مستقله  الأجواء.... وتعمل على راحه مواطنيها.

نقيب الموسيقين

نريد دستور متناغم مع العالم... ويعمل على وجود هارمونى مشترك بين جميع فئات الشعب ليكون الشعب لحنا واحدا... موزعا توزيعا جيدا على كافه اطرافه فى سيمفونيه عمل رائعه بدون اى مواطن نشاز ...يغرد خارج السرب أو الفرقه ...

ولذا اقترح ان يكون البند الأول ....الشعب هو المايسترو ....لهذا الوطن 

الدكاتره

سيدى الرئيس ....الأطباء ابناء ابوقراط يريدون دستورا عادلا....يجبر الكسور المجتمعيه...ويعالج الخلل الطبقى...ويمنع جرثومه الفساد من الأنتشار ويحد من الأوبئه المتفشيه فى النظام الحكومى...

وانا عايز اشهدك ياسياده الريس....

يعنى ينفع  دكتور محترم بقاله 9 سنيين فى الكليه يتخرج يشتغل ب200 جنيه فى الشهر ....دول يعمل بيهم ايه؟؟؟ يشرب بيهم بيبس...

لذا اقترح ان يكون البند الأول فى الدستور هو المساواه بين جميع افراد الشعب قانونيا وماديا...

الصيادله

دواءنا وعلاجنا ياساده... فى حفظ الحقوق والواجبات.... وتحديدها وتعريف جرعاتها بدقه وعدم السماح بأى تفاعلات مجتمعيه او تأثيرات خارجيه تؤثر على حاله الأستقرار الداخلى للبلاد...و يجب ان  نتجرع اى علاج للأقتصاد المتردى ولو كان مرا...ويجب محاربه الفساد ومراقبه كل مسئول  قبل الأكل وبعده ...وعايزين روشته محكمه لمعالجه البطاله ...بدل  _اللبخه_ اللى احنا ماشيين عليها دى ....ولذلك اقترح ان يكون روح دستورنا هو مبدأ ان الوقايه خير من العلاج...ولو ان الأخوه فى النقابه هيزعلوا منى ....

الصعايده

فى هدوء وشموخ وقف حمدالله عبدالجوى المتعال  الأسيوطى ...مندوب الصعيد....وجال...

ياسياده الريس عايزين دستور يهتم بالصعيد وولاده وبلدياته وحدياته ويطورهم ويعلمهم  ويشغلهم وجبل كلاته  ....يحترمهم

ويشركهم فى بلاوى بلدهم الى هما شايلينها شايلينها...وطايلاهم طايلاهم....

ونطالب بمنع النكت ....

ومش عايزين حاكومه ...ماشفناش من اى حاكومه حاجه عدله

من النهارده مفيش حاكومه....احنا الحاكومه

ملوحا بنبوته فى الهواء.....

ولم يجرؤ اى من الأعضاء على الأعتراض ...او التعقيب... او التصفيق

  

 اهل النوبه

ثم وقف عمربوسيدون الأسمر مندوب النوبه وقال...

نوبا ويا ايوا تونيللى ايدين ايجوو اسسن ايجوو واو نوبا واباسينجرييين ....ايديندوبيا...نوباويا....

نوبا ويا ايوا تونيللى ايدين ايجوو اسسن ايجوو واو نوبا واباسينجرييين ....ايديندوبيا...نوباويا....

نوبا ويا ايوا تونيللى ايدين ايجوو اسسن ايجوو واو نوبا واباسينجرييين ....ايديندوبيا...نوباويا....

النوبه هى مصر ومصر هى النوبه ياهضرات....

والسلام عليكم ورحمه الله وبركاته

  

زعيم الفلاحين

ياسياده الريس عايزين دستور يكون كده طازه وصابح ...ومالوش فى الكيماوىولا السباخ ويلغى الجمعيه الزراعيه الى بتتحكم فى الفلاح وتبيع السماد فى السوق السوده....وتوفر لنا ميه نضيفه للزرع ...ومبيدات نضيفه برده مش من المسسمه بتاعه اسرائيل ...ويلغى البتاع اللى اسمه الجولف ده... الى كل شويه ياخد الميه بتاعه الزرع ويمنع البنا على الأرض الزراعيه ويساعد الشباب على زرع  ارض جديده فى الصحرا البعيده

ريس العمال و الصنايعيه 

العمل عباده ياريس ...عايزين نشغل ولادنا فى مصانعنا ونحافظ على حقوقهم .....عايزين دستور  يحافظ على  الأوفر تايم .... ويدافع عن حقوق العمال عند  اصحاب الأعمال ....ويؤكد على ان الخميس والجمعه اجازه كل اسبوع وبأجر مضاعف...عايزين بيئه صالحه للعمل والأنتاج ...واللى يحصل عنده زياه فى انتاج الأطفال لازم كمان مرتبه يزيد ..... ياريس ....عايزين دستور ادارجى مدقدق متظبط...مش متحفلط ولا مليط ... من غير رايش وواغش مترجرش ومخدوم عليه كويس ...راشق على السن...مابيحدفش ولا بيلعب لا يمين ولا شمال ...ولو مظبطش يتبدل فى ثانيه....

زعيم اليساريين

 ايها الرفقاء .... احيكم واحييى جمعيتكم الثوريه ...واحب اقول للأخ فرانسيس فوكوياما نهايه التاريخ لسه ماجاتش ....واحب اقول للأخ الرفيق صمويل هنجتون لسه صراع الحضارات شغال وماخلصش .....واحب اقول لريس الجمعيه عايزين دستور يحفظ المكتسبات العماليه الثوريه  وتحالف قوى الشعب القويه ويوفر الضمانات الأجتماعيه لكل افردا الشعب ....

ممثل الليبراليين

ايها الساده ملخص موقفنا فى دستوركم الأغر هو الحريه ...لا نريد سوى الحريه للفرد والمجتمع وهى كفيله  بصنع التقدم ....والرخاء والرفاهيه والأزدهار الأقتصادى والأجتماعى

حريه الفرد وحريه المجتمع.....حريه الفكر وحريه العقيده....حريه العلم وحريه الفن....حريه الرأى وحريه التعبير ....

دكاتره الجامعه

الهدف الأكاديمى للدستور ... هو توسيع المشاركه النسبيه للمحاور الطوليه والعرضيه للمؤلفات الطبقيه لشرائح الشعب ...واعتماد طريقه توثيقيه تنشيطيه تفاعليه لتبادل السلطه....وتوافق مجتمعى حول الطرق التناسبيه التقريبيه لأداره الشئون الإقتصاديه والأجتماعيه للشعب...ووضع مفهوم واضح للمشاركه الشعبيه المجتمعيه والنخبويه التقدميه لأداره شئون الوطن ...

  

التجار

سياده الريس  الدستور  مناوله مش مقاوله ....عايزين دستور يعمل  هات وخد....دلوقتى ....كاش مش قسط... ويدور العجله ويرمى ربح سريع على الشعب كله...ويشغل اللى مالهمش شغل ويزود شغل اللى شغال....لأن الميه لو ركنت تعفن على طول ....

المحامون

سياده الرئيس... الساده القضاه...ان الدستور الماثل امامكم....لابد ان يحقق طموحات الشعب ...واهدافه فى الحياه الكريمه...واحذر كل من لا يعمل لهذه الأهداف ...باننا لن نسكت بعد اليوم....ولن يستكين الشعب المصرى لأى ظلم او ظالم...مضى عهد الديكتاتوريه فى مصر ياساده...

واخيرا فأنى اطالب بتطبيق اقصى العقوبه على كل من لايعمل من اجل هذه الأهداف.

المحاسبون

سيدى الرئيس يجب ان نعلم ان لكل اجل كتاب... ولابد عن يوم ويجى فيه الحساب

نطالب ان تكون الضرايب تصاعديه والجمارك تنازليه...الميزانيه تعتمد من جمعيه المحاسبين والمراجعين قبل ما تتعرض على مجلس الشعب...

وضع حد ادنى و اقصى  للأجوروالخدمات ومنع المحسوبيات وعدم سريه الحسابات للمسؤلين والمسؤلات....

معلم الجزارين

يامعالى الريس عايزين دستور مشفى احمر من غير شغت لبانى ورور ....كفايه الجملى اللى كنا فيه.... خالى العضم والدهن...سهل الهضم وحلو الطعم...والأسعار تكون على قد ايد كل مواطن...واى تدخل خارجى زيه زى الدبح بره السلخانه... مرفوض ...مرفوض ...مرفوض

الاعلاميون

الأعلام هو السلطه الرابعه وهو ضمير الأمه ...وعين الشعب...واواعدكم ان استضيفكم جميعا فى برنامجى ع الفضائيه لتتحدثوا جميعا عن عظمه هذا الدستور

لذا اقترح ان يكون البند الأول فى الدستور هو السلطات فى الجمهوريه اربعه ...تشريعيه وتنفيذيه وقضائيه واعلاميه...

الطلبه

التعليم ياسيادنا مش مظبط ....ومش روش ...عايزين تعليم يفهمنا العالم ويعرفنا ازاى نتعامل معاه .....وسورى يعنى مش حقدر امضى ولا اكتب معاكو اى مسودات الا لما تنزلوا الدستور على الأى باد ...وتوزعوه على الطلبه فى الدارس والجامعات

الرياضيين

عايزين دستور مودرن حديث وسبورلذيذ وخفيف سهل الهضم وكله قيم غذائيه وحريه  عاليه وينشر الرياضه ويخليها حق لكل مواطن عشان نخش الأوليمبيه....ونشوف الشعب كله بيمارس الرياضه بدل ماهو بيجرى ورا الأتوبيسات...ويلعب كوره بدل ما يضرب شماريخ فى الماتشات ....ياابوالكباتن...عفوا ياسياده المستشار

الشرطه

ايها الساده .....على الطلاق الشرطه فى خدمه الشعب ....ومش قايل اى حاجه تانيه...

الشباب

هتف مندوب الشباب ...من ايام 25 يناير وانا قاعد اقولكم عيش ....حريه ....عداله اجتماعيه ...ترجموها انتوا بقى ...

فن نهايه الجلسه تفاءل الجميع واستبشروا خير بدستور شامل جامع  مانع متسق حيوى للأجيال القادمه....

فى خارج القاعه وقف كل من ....

الفنانه اللوذعيه شذا عرفى  ....ممثله منظمه" راقصات بلا حدود" تطالب بحق المنظمه ونقابه الراقصات بالإنضمام للجمعيه التأسيسيه لصياغه الدستور

الأستاذ بهاء احمد ابو البهاء.... ممثل" الجمعيه الشرعيه للمؤمنين "....يطالب بتعديل وضع الأقليات الدينيه فى الدستور الجديد

الأستاذ سامح شمالى ... عن الأناركيين... يطالب بالاسلطويه ورفع يد الحكومه عن الشعب ....ويهتف..._ضد السلاطه من اجل العيش .....عفوا.... ضد السلطه من اجل العيش_

 الأنسه لمياء الوجدى  ...ممثله  حركه " نساء بدون غطاء" العالميه ...تبدى اعتراضها على الجمعيه التأسيسيه و كثير مما جاء فى اقتراحات الدستور ...بطريقتها الخاصه جدا ....

مجموعات كبيره من شباب الألتراس "وايت نايتس "و"ريدديفلز" و"جرين ايجلز" و "يولوفانز".....يطالبون بتمثيلهم فى الجمعيه التأسيسيه والا مفيش كوره هتتلعب تانى فى مصر...

مجموعه كبيره من الملتحين والمنتقبات يمثلون التنظيمات السلفيه الجهاديه... والسلفيه الوهابيه ...وسلفيو كوستا ... وسلفنى شكرا ....ويطالبون بدستور يطبق الشريعه...

مجموعه كبيره من ذوى الأحتياجات الخاصه....يطالبون ان يكون لهم عين الأعتبار فى الدستور الجديد

وحين عرض الدستور للأستفتاء تم رفضه من الشعب بنسبه 99% وذلك للأختلاف البند الأول عما اراده ممثل كل طائفه ...فقد كان  نص البند الأول كالتالى :

الشعب مصدر السلطات...

الدوله الهيكليه

الدوله الهيكليه (من كتاب رسائل الى الرئيس)

تبدو مصر الأن دوله هيكليه وبامتياز ......هتقول يعنى ايه هيكليه ....اشرحلك يا سيدى

زمان ايام حرب الإستنزاف كانت مصر بتبنى حائط للصواريخ.......ماشى

واسرائيل كانت بتلاحقه وتقوم بالإغاره عليه يوميا لمنع بنائه......جميل

هذا الحائط يتكون من مجموعه من قواعد الصواريخ المنتشره فى مصر كلها وللتغلب على العدو لجأ المصريون لحيله قديمه وهى فى وسط القواعد المبنيه السليمه يعملو كده كام قاعده فشنك ...هيكليه يعنى خشب فى كارتون  يقوم الطيران الإسرائيلى يتلخبط وما يعرفش القواعد السليمه من الفشنك ويضرب لخمه .... عرفت يهنى ايه هيكليه ؟؟؟؟؟؟

بلغه خالتى بمبى يعنى من بره  هلا هلا ..... ومن جوه يعلم الله

وبلغه شبابنا بتوع الفيدو جيمز_ video games_ زى بالظبط الديمو فيرجن_demo version_ يخليك تتفرج على الجيم كويس وتعرف مميزاته لكن ما تلعبش غير مرحله صغيره جدا وباقى الأوبتشنز كلها ديمد_dimmed_  باهته.... رمادى يعنى ومش شغاله ولو عايز تلعب بجد هيبعتك على صفحه الكريدت كارد_credit card_ وادفع بقى يا حلووووووووووو

فهمت يعنى ايه هيكليه؟؟؟؟؟طيب ليه مصر هيكليه ؟؟؟؟؟ا..........اقولك

مصر هيكليه يا سيدى لأنها برده كده مفيش فيها حاجه شغاله كله منظر وبس....

لو  مسكنا اى مجال فى مصر وحبينا نشوفه هنلاقيه بيثبت هذه النظريه خد عندك ...

التعليم مثلا طبعا البلد فيها وزاره تعليم وتربيه كمان فوق البيعه ...وفيها وزاره تعليم عالى.... ومليانه مدارس وجامعات وكليات ومعاهد عاليه وواطيه ومتوسطه.... اشى حكومه واشى خاصه و تجريبيه وتجريديه وتكعيبيه.... ومنها الى مصرى والى اجنبى ماشى زى بلاد بره...وعندنا مدرسيين واداريين وفراشيين  وطلبه واتحاد طلبه ودروس خصوصيه ومجموعات تقويه وسبوره وطباشيرومدرجات وداتا شو وكتب داخليه وكتب خارجيه وكتب منوفيه  وملازم... وملاحق...وامتحانات ولجان وظباط  وثانويه عامه وناس بيغمى عليها كل امتحان .......لكن الواقع ان مفيش تعليم وإن مستوى الخريج فى مصر بقى بينافس مستوى الخريج فى الصومال اللى هيه بقالها 20 سنه من غير لا دوله ولا حكومه ولايحزنون......واصبح التعليم فى مصر كما قال خالد الذكر الباشمهندس طه حسين كالماء والهواء .....وانت ادرى بحاله الميه والهوا فى مصر .....الميه ملوثه زى مانت عارف من الصرف الصحى والصناعى والزراعى اللى بيترمى فى النيل ومن المواطنين اللى بيغسلوا هدومهم وبيرموا حيوانتهم فى الترعه و تقريبا 50% من الشعب بيشرب ميه صرف صحى ....اما عن الهواء فهو زى مانت عارف يحمل اعلى نسبه تلوث فى العالم من الهباب بتاع العربيات ومداخن مصانع السيراميك والأسمنت ...ولو كنت ناسى ....السحابه السوده اكييد هتفكرك

وزى ماهو دا حال الماء والهواء هو دا حال التعليم فى مصر.....

طيب سيبك من التعليم....

لدينا تليفزيون حكومى وقنوات ارضيه... وقنوات محليه... وقنوات متخصصه ...وطوفان من القنوات الفضائيه الى جانب المحروس ... التليفزيون المصرى بقنواته العجيبه ...ودا بقى حاجه فللى  قد الكف ويموت ميه والف ....يصرف بالمليارت ويبعزق بالألوفات ...وفالقنا ومصدعنا برامج طبيخ بايت وعزيزتى حواء.... ومسلسلات مسيله للدموع ...ومسببه للتخلف العقلى... ومذيعات فوق السن تطل علينا بعد المرور على جميع ورش دوكو بولاق والسبتيه ...

ومع ذلك مايعرفش ينقل خبر من الشارع اللى وراهم ...وبيذيع نشرات اخباريه من سيبيريا ويستضيف اهل الكهف للحديث عن العصر الحجرى واهو اى عجين والسلام ...وبالتالى وهو مسبب رئيسى لنشر الجهل والأميه والتخلف عبر برامجه.... التى لا ينافسها فى الإنتشار سوى فليت العسكرى ...

لدينا ايضا صحافه محليه وجرائد قوميه شبه رسميه وصحافه حزبيه وصحافه خاصه وطوفان من المطبوعات اليوميه والإسبوعيه والشهريه  ونقابه للصحفيين يتظاهر على سلالمها المتظاهرون ....ودى اهم فايده ليها ....الا اننا لا يوجد لدينا اى حريه فى تداول او معرفه المعلومات ولا يوجد اى مصدر مسئول فى مصر_ مسئول بالفعل _عن تصريحاته ولا يوجد اى مصدر رسمى للتأكد من اى خبر او معلومه او احصاء بالرغم ان عندنا مركز للمعلومات ودعم اتخاذ القرار تابع لمجلس الوزراء ...وهيئه عامه  للتعبئه العامه والاحصاء وهيئه للمساحه واخيرا وليس اخرا جهاز مركزى للمحاسبات ليس له علاقه بالحسابات ...

ولذلك لايوجد لدينا اعلام او ثقافه من اى نوع وعلى ذكر الثقافه فلدينا ايضا وزاره للثقافه وكأننا فى الستينات ولدينا وزير فنان ...فى البقاء فى الوزاره... ولدينا مسارح بتتحرق فى بنى سويف _راجع صفحات الحوادث_ وهيئه عامه لقصور الثقافه  وقصور ثقافه وهى اسم على مسمى ...لأن لديها قصور فى الثقافه وثقافه جماهيريه وثقافه غير جماهيريه ومتاحف لا يعرف عنها المواطن اى شى وتوضع الأثار فيها بنفس  طريقه مخازن شركات الصوامع والمطاحن ...ولدينا لوحات عالميه _بتتسرق_ وأثار كونيه _بتتنهب_وهيئه عامه للكتاب لا تدعمه بأى صوره من الصور  ومعارض سنويه للكتاب _يقابل فيها الريس بلدياته_ ومهرجانات دوليه للسينما غالبا لا تجد اى افلام مصريه لعرضها وتحرص على انفاق ميزانيتها على  استضافه اى نجوم من الصف السابع الأجانب غير مشهورين فى بلدانهم الأصليه ويندهشون حين تأتيهم الدعوه للأقامه _فولبورد__full board_ ويندهشون اكثر حين يصفق لهم الجمهور وهم يتسلمون جوائز عالميه لا يعرفون سببها وغالبا ما يصفق الجمهور لصاحبه الفستان الأقل استخداما للقماش وهذه هى" الثقافه" الوحيده المنتشره فى مصر   .

و تؤمن الحكومات المتتاليه لدينا بأنتهاء عصر الزراعه بعد اكتشاف البخار وان النشاط الزراعى لم يكن ملائما للمصريين الا فى العهد الفرعونى ولذلك بعد هوجه الفدادين الخمسه والخمس فدادين اللى وزعتهم الحكومه فى الستينات  استغلت جميع الأراضى الزراعيه فى ...التجريف لعمل الطوب الأحمر  تمهيدا لدخول الفلاحين عصر النهضه ودخول الأراضى فى كردون المبانى ودا انفع 100 مره للفلاح صاحب الأرض ...وطبعا لدينا وزاره للزراعه تتعاون مع اسرائيل وتجيد استخدام المبيدات المسرطنه وتبيع السماد فى السوق السوداء وتسمح بتحول اللأراضى المستصلحه الى منتجعات للجولف وبحيرات صناعيه فى الوقت الى بتقفل فيه الميه على الأراضى المزروعه رز لأنه بيهدر المياه وتدمن ادخال شباب الخريجين وصغار المزارعين الى السجن عن طريق بنك التنميه والإئتمان الزراعى وهى سياسه عامه للدوله تحد من الفلاحين وتحولهم الى فئات لضمان نزاهه الإنتخابات ...

اما المواصلات فى بلدنا....فلدينا وزاره كبيره للنقل والمواصلات ثم اصبحت للنقل بس وسابت المواصلات فى حالها... وهيئه للنقل العام ...وهيئه للطرق والكبارى...وهيئه للأنفاق... ومترو للأنفاق بيمشى تحت وفوق وسكه حديد هى رقم 3 فى العالم تاريخيا _الله يرحمها انجلترا لما كانت لا تغيب عنها الشمس _ وادارات للمرور بجميع المحافظات والمدن ومع ذلك تعيش جميع مدن مصر فى ازمه مرور دائمه ...وازمه مواصلات طاحنه ...ويحكم الشارع المصرى امبراطوريه الميكروباص وتتفوق القاهره عن باقى المحافظات بظاهره توقف المرور تماما من اجل مواكب المسئولين الرئاسيه والوزاريه العامره ...ولذلك فأن اى مشوار فى مصر اصبح ينطبق عليه ما قاله  الزعيم الخالد عادل امام "مشى 10 دقايق بالأتوبيس نص ساعه "

ولدينا القطاع العام.... الله يرحمه وقطاع اعمال وشركات قابضه واتحاد عام للصناعات واتحاد عام للغرف التجاريه واتحاد للمقاولين وهيئه للتنميه الصناعيه وهيئه لمواصفات الجوده وهيئه للتوحيد القياسى ومصانع مثل المصانع الحربيه اللى عملها عبدالناصروباعها مبارك زى مصنع 66 الحربى و99 الحربى ومصنع الطائرات والذى ينتج حاليا وبنجاح  اجود انواع.... المراوح ....هذا بالإضافه الى الهيئه العربيه للتصنيع الى بدل ما تنتج شاشات رادرا بتنتج  شاشات التليفزون .... الا ان حال الصناعه عندنا هو ان الحكومه كل ماتتزنق تبيع لها كام مصنع على كام شركه وتقولك خصخصه ودا  بقى موضوع يحتاج مؤلفات....وتحول بذلك امهر العمال والأسطوات الى مرتادى المقاهى تحت عنوان المعاش المبكر ... وخد عندك مثلا ...فبعد عجزها عن تطوير عمر افندى باعته للقنبيط المستثمر السعودى والذى تعهد بتحويله الى سى عمر فى اقرب وقت وهذا هو التغيير ....دا بعد طبعا ما رهن مقراته الأثريه وباع اللى ينفع يتباع ورهن اللى ينفع يترهن وزى ما بقولكوا الخصخصه دى عايزلها قاعده تانيه خالص ...

الخلاصه ان فلسفه االصناعه لدينا هى نشر شعار... صنع فى مصر ولكن  بمااننا ماعندناش وقت نصنع من اول وجديد فاحنا يدوب شغالين على  التعبئه والتغليف تمشيا مع سياسه احنا اللى دهنا الهوا دوكو... واحنا اللى خرمنا التعريفه... لكن ماحدش قال  احنا الى عملنا _صنعنا _التعريفه قبل ما نخرمها ...او احنا اللى صنعنا الدوكو الى دهنا بيه الهوا ولذلك يمتلئ السوق المصرى بمنتجات صنعت فى جميع بلدان العالم ومنها من هو ليس عضوا فى  الأمم المتحده من اساسه ... لكن من النادر ان تكون مصر بين هذه الدول...

طيب بلاش الدوله والحكومه خد عندك قطاع الرياضه مثلا .... عندنا نوادى وفرق ومنتخبات ولعيبه ومجلس اعلى للرياضه واتحاد الكوره واتحادات للأنديه واتحادات للعبات وزاهر والمعلم حسن شحاته وميدو احتراف وملاييين بتدفع للعيبه وقنوات رياضيه شغاله شتيمه ليل ونهار ومشجعين وبلطجيه والتراس ومنتخب حاصل على المركز رقم 9 فى العالم واخد كاس افريقيا 3 مرات متتاليه ويفشل دا ئما فى الوصول لكأس العالم ....ليه لأن ماعندناش رياضه من اصله حيث ان المواطن لا يمارس اى نوع من انواع الرياضه الا شد الشيشه فى القهوه وحرق الشماريخ فى المدرجات وهى دى الرياضه الوحيده اللى يعرف يمارسها ....

خد بالك من اللى جايه دى بأه ...عندنا الدستور ولدينا دستور 1923 ودستور 1971 ومحكمه دستوريه عليا تكشف لنا دائما ان معظم القوانين التى تقترحها الحكومه ويقرها البرلمان هى فى اللأساس غير دستوريه ولا علاقه لها بالدستور والفضل يرجع الى الساده الترزيه مبتكرو الموضات القانونيه الحديثه .... وفى مصر غابه من القوانين ....وترسانه هائله من اللوايح حسب الطلب و التى يعجز عن حصرها رجال القضاء انفسهم ولدينا قضاء شامخ... وقضاء جالس ....وقضاء واقف ....وقضاء شرعى ....وقوانين لأى شئ وكل شئ.... قانون مدنى وجنائى ومرافعات وتأمينات ومعاشات وايجارات واحوال شخصيه وخلع  ومحاكم للأسره و محاكم اقتصاديه ومحاكم اداريه ومحاكم كليه ومحاكم جزئيه... لكن ملخص احوال العداله فى مصر هو ماقاله الممثل    احمد راتب     فى فيلم الإرهاب والكباب "30 سنه فى المحاكم مش عارف اخد حقى ويوم مااتهورت وقتلته طلع لى حكم الإعدام فى 6 اشهر" فالعداله فى بلادنا  راكبه سلحفاه على استحياء  .....والقانون لا يطبق بقوه القانون ولكن بقوه المواطن فلو كنت مواطن عادى يطبق عليك القانون 100% اما لو كنت مواطن فايق شويه ومن عينه انت ما تعرفش بتكلم مين  ممكن يبقى 50 % ولو كنت مواطن من الساحل الشمالى فأكيد لا يطبق عليك اى قانون من اصله ....اذ ان هناك خارجون على القانون وهناك خارجون من تطبيق القانون وبعد دا كله يحدثك  الجميع عن نزاهه وعراقه واستقلال القضاء المصرى الشامخ ....

و عندنا  مجلس  شعب _سيد قراره _و مجلس شورى_ قاعد فى حاله_ ومجالس محليه  واعضاء منتخبين ...واعضاء معينين... واعضاء متزورين ومطعون عليهم وعندنا جميع انواع النواب ....نواب القروض ....ونواب الكييف ...ونواب القمار .....ونواب تهريب المحمول .....ونواب الصمت... ونواب تأشيرات الحج ونواب  تأشيرات الوزراء المضروبه... ونواب العلاج على نفقه الدوله ودول بيعملوا عمليات تجميل لأهاليهم على حساب الدوله...ونواب رقصوا فى البرلمان دا غير النواب النايمين طبعا واخيرا وليس آخرا...نواب سميحه....

وعندنا انتخابات نزيهه وانتخابات حسنيه ....ولجان ومرشحين وصناديق ودعايه ويفط واعلانات ومعارك بين المرشحين واحزاب ومستقلين و 50 % عمال وفلاحين....50% لوءات وموظفين  والباقى بيشاور عقله... واستجوابات وطلبات احاطه وموافقه ومنافقه ....وطبعا دا لأننا نعيش فى ازهى عصور الديمقراطيه .....الا اننا لم ننجح حتى اللأن فى تنفيذ اهم اهداف ثوره يوليو المجيده وهى ....حياه نيابيه سليمه

عرفت يعنى ايه دوله هيكليه؟؟؟؟

دا الكلام اللى كنت كاتبه قبل الثوره اما بعد الثوره فتأكدت من صحه النظريه .....فاذا اننا عملنا ثوره وقف لها العالم احتراما وراح لها شهداء وثوار وتسببت فى خلع مبارك وشهداء ومليونيات ومتظاهرون ونشطاء وحركات سياسيه واحزاب قديمه على جديده وفلول ومجلس عسكرى ولكن يبدو ان النظريه مازالت مستمره .....مفيش حاجه اتغيرت....

لذا سياده الرئيس القادم...وحياه ابوك ياشيخ ....تغير لنا النظريه دى بقى...

انياب الديمقراطيه بين المورسى والفشيق

 ..... الى الأخوه الثوار والمناضلين..... يبدو ان الثوره المصريه مصره تكون ثوره ضاحكه لذا.....بعد تفكير عميق  فى هذا المأزق اللا ديمقراطى ..... لا تقاطع ولا تبطل صوتك

فقط .....اول يوم روح انتخب مرسى .....وتانى يوم روح انتخب شفيق........ونتقابل يوم النتيجه فى التحرير..........موبيلات  بقى..دا لو مقطعوش الإتصالات......

ولكن افه حارتنا النسيان .....

ولكن افه حارتنا النسيان .....

وفى نهايه قصه على بابا  و 40 حرامى ...رفض على بابا ان  يعيد اى من المسروقات الى المغاره ......واختاروا اكبر ....... الحراميه سنا ليتولى اداره المغاره .....بعد ان وعدهم بتغيير شامل .......لديكورات المغاره .....وتغيير البصمه الصوتيه للباب من افتح يا سمسم الى ....انهب يا مشمش

اكبر اشاعات النظام

اكبر اشاعات النظام

اكبر اشاعات واكاذيب النظام السابق كانت كلمه مصر- مبارك ودى اللى مش  قادر افهمها ولا ابلعها ازاى  دوله زى مصر تختزل وتتسمى باسم شخص واحد مهما كان هو مين هذا الشخص وابن مين فى مصر يعنى عشان مصر تتسمى على اسمه

مصر اللى هى 85 مليون بنى ادم تتحول وتبقى بتاعه بنى ادم واحد بس ....

....مصر اللى هى أقدم دوله فى التاريخ و7000 سنه حضاره تبقى باسم شخص؟؟؟ دا مفيش فرعون من الفراعنه الفاتحين ولا الغامقين حتى رمسيس التانى... كان يجرؤ يقول كده كان كهنه امون شردوه فى المعابد ...

مصر اللى هى مليون كيلومتر مربع يبقوا بتوع شخص واحد عليها اسمه ازاى يعنى ....

مصر اللى هى مقبره الغزاه من الهكسوس للصليبين لللأتراك للفرنساويين للإنجليز للصهاينه تتسمى باسم واحد على اسم جده؟؟؟؟؟ازاى يعنى ....

اما تانى اكبر الأشاعات بتاعه النظام كانت انه صاحب ازهى عصور الديمقراطيه.....والديمقراطيه دى كانت حسب تعريف النظام انك تقول اللى انت عايزه زى مانت عايز .....والحكومه تعمل اللى هى عايزاه زى ماهى عايزه ...وتعمل فيك برده اللى هى عايزه...على اساس ان دا شعبى وانا حره فيه...اغسله واكويه.... افرده واتنيه....ماحدش ليه دعوه بيه... وهى دى الديمقراطيه

تالت اشاعه ان مبارك هو صاحب حكمه ولا اعمده الحكمه السبعه و_دول اكيد فى شرم الشيخ_ وحكيم عيون يفهم فى العين ورموش العين ... وجميع الدول العدو قبل الصديق اى والله تستقى منه الحكمه فمره تلاقيها كاتبه ان دوله زى المانيا تقدر حكمه مبارك العظيمه ورزانته فى الحكم ... ومره تلاقى عنوان زى ايطاليا تتطلع الى زياره  مبارك اى والله تتطلع يعنى هتموت ويطلع ليها عين ومبارك يزورهم عشان ينعموا بحكمته الرشيده... طبعا الموضوع اتفقس لما ويكيليكس قالت ان بيرلسكونى كان مهرب فلوس وعلى علاقه بواحده من اياهم ذات جنسيه عربيه وبيرلسكونى اصر انها حفيده مبارك....مش انا اللى بقول دا ويكليكس اللى بتقول عشان ماحدش يغهمنا غلط....

وبعدين يصدعونا ان اى خطاب يلقيه  مبارك هو خطاب تاريخى حتى لو كان بمناسبه شم النسيم...واى لقاء بيعمله هو لقاء تاريخى حتى لو كان هيقابل بقلظ بتاع ماما نجوى زى ما كانت سوزان مبارك بتقابل خوخه بتاعه عالم سمسم كل دى لقاءات تاريخيه على اسا س ان التاريخ دا مرارته واسعه ويشيل من الحبايب الف و ميه...

والنكته الكبيره انه بعد مناقشه اى ميزانيه سنويه اللى هى تاريخيه برده تطلع الجرايد وتقول انها اكبر ميزانيه فى تاريخ مصر طب ماهى لازم وحتما ولابد هتكون كده لأن كل  سنه هتكون الميزانيه اكبر من السنه اللى قبلها يعنى... الا لو كنا ناويين نناقش ميزانيه السنه دى ونقارنها  مع ميزانيه سنه 1919

من اظرف الإشاعات ان حكومه مبارك اهتمت بالبنيه التحتيه....ودى طبعا ماكانتش....."تحتيه" انا لوحدى دى كانت تحتنا كلنا ....ودى غير البنيه الأساسيه طبعا اللى النظام ماكنش ليه هم غيرها وربنا ما يجعلنا قطاعين طرق وكبارىوكارتات تلم فلوس من العربيات ما تعرفش بتروح فين ....واتصالات فواتيرها مولعه جيوب الشعب كله وشعارها زى ما بيطلع فى إعلانات التليفزيون بصوت محمود يس"شبكه واحده تلمنا كلنا" ...وواضح ان  اللى كتب الإعلان دا كان من قياادات امن الدوله الله يرحمه....

اما اكبر الإشاعات فكانت ان حكومه نظيف هى الحكومه الإلكترونيه... وانا عايز اى واحد يدينى اى اماره انها  كانت حكومه الكترونيه غير انها قطعت علينا  النت والموبيل يوم الثوره...